Bekabung buat Keluarge Bang Ridwan Kamil

Ape mau dikaté, émang udah takdirNyé. Kite bedoe ajé. Nyang paling baék buat keluargé Bang Ridwan. Dicari hikmahnyé.

Sabtu, 4 Juni 2022 | 10:07 WIB
0
148
Bekabung buat Keluarge Bang Ridwan Kamil

Kagak terasé aérmata jato belinang. Terus ngucur kagak bisa dita'an. Kité semué nyang punyé anak, ngurusin dari lair, seumur hidepnyé, udah ngerasain jadi babé, jadi enyak, tao rasanyé keilangan anak. 

Jangan katé kagak pulang lagi, jarang pulang aja, bikin kangen. Ditanya'in, diudak. Apalagi pegi buat selamenyé. Sedi banget.

Inalillahi wa ina illaihi rojiun. 

Ayé ame keluarga besar jemaah Fesbukiyah di sini, ikut beduké, ikut bekabung buat Abang Ridwan Kamil, buat Mpok Atalia Paratya jugé, amé keluarga besarnyé. Moga, ridho laér batinnyé. Diterimé jadi takdir amé kehendak Nyang Mahe Kuasé. 

Buat ananda Emmeril Kahn Mumtadz alias Eril, semoga diterimé arwahnye. Diterima semua amalnyé, ibadahnyé. Solatnye, ngajinye. Ditambahin pa'alanyé. Dapet surgéNyé. Amin. 

Kita manusié punya mao, tapi Nyang Kuasé punya putusan.

Sedari adé kabar ilangnyé Eril, terus nyari ke tempat kejadiannyé, ayé dah merinding. Poto terakhir waktu di bandar udaré jalan kendiri, kagak ada anak, bawé koper, berase banget. Bikin merinding. Nyerédét haté, katé orang Sundé. Juga pideo nyang di pinggiran kali. Ngaduk aduk aér, ikhtiar kali kali ada dapet jasadnyé. Bikin ati peri. 

Kebayang, berangkat amé anak, pulang kendiri. Selaményé, kagak ketemu lagi. 

Mana itu anak cakep pisan, pendidikannyé tinggi, lulusan luar negeri. Tinggal ngegawé. Bolé diarep jadi kebanggaan keluargé, malah buat bangsé kité semué. Pan generasi penerus kité musti ada wawasan luas, banyak sekolah, ada pengalaman di negeri sono, nyang ude maju. Biar bisa bangun negri kendiri. 

Ape mau dikaté, émang udah takdirNyé. Kite bedoe ajé. Nyang paling baék buat keluargé Bang Ridwan. Dicari hikmahnyé. 

Buat sodare semué, jangan nyalahin siapé siapé. Jangan nambahin sedihé

keluargé nyang ditinggal. Kalau udah gini, émang udah nasibnyé. 

Dikit dikit ayé ada pengalaman juga soal renang amé kali. Entu anak pan bukan asal nyebur ke kali? Timbang nyemplung amé berenang. Na, dié punyé sertifikat nyelem di laut, tau arus ombak. Ude lulus ujiannyé. 

Bisa jadi mendadak kram perut atawé kram kaki. Kena air dingin. Itu emang sering kejadiannyé di dalam aér. Biar pengalaman, biar jago renang, kalau udé kena kram perut, kaki kram kagak bedayé. Sakitnya minta ampun, kagak bisa ngapé ngapé lagi. Apélagi badan kebawé arus kali di bawé.

Ayé sih kagak tahu persisnyé. Cuman modal nebak nebak. Kita semué, cuman tahu dari berité yang adé internet.

Mangkényé, jangan padé sok tau. Apélagi nyalah-nyalahin kagak puguh, nimbrung, kayak nyang paling pinter. Kagak danta. 

Udé, pokoknyé ngedoa'in ajé. Kirim al patékah, solat ga'ib.

Bang Ridwan Kamil amé Mpok Ataila;

Bunga Kecubung di pinggiran kali

Di pinggiran kali adé nyang ngiring sado

Kite bekabung dalem sekali

Semogé Bang Ridwan amé Mpok Ata atinya ridho. 

Allaahummaghfir lahu warham hu wa’aafi hii wa’fu anhu.

Amin.

***